قال لي مسئول "المفترض انه كبير قوي قوي"، أن هناك خطة عظيمة وقومية لزيادة إنتاج الزيت من 523 ألف برميل ل 550 ألف برميل يومياً، رديت باستغراب: يعني هي المشكلة في الالفين تلاتة دول!!، وللدرجة دي محتاجين كل التخطيط ده عشان نسد العجز بين الاستهلاك المحلي والاستيراد!!
ورددت في سري الراجل ده بيقول كده ليه، ومن غير شتايم طبعاً ، دا فيه شركات نزل إنتاجها بسبب الفشل الإداري أكثر من 6 آلاف برميل، دا ممكن لو إنتاج الشركات الصغيرة رجع، هيغرق مصر زيت!!
دا بيحصل ليه، لأن السادة المسئولوين عارفين كويس إن مهندسين البترول في القطاع، هم فقط من يعرفون مواطن القوة والضعف، وهم من يعرفون أين يوجد البترول في كل المواقع، وهم من يعرفون كيف يزيد الإنتاج دون دخول حفارات جديدة أو آبار جديدة أو أي تكلفة جديدة أو اي سرقة جديدة .
وحتى تتأكدوا من هذا الكلام، لدينا تجارب للبعض منهم، فعندما شغلوا رئاسة شركات بعينها ارتفع الإنتاج بعد هبوطه، وعندما غادروا هبط الإنتاج كأن لم يهبط من قبل...والشلة اياها هي التي تسببت في إبعادهم واذيتهم قبل مجيئ وزير البترول الحالي، بسبب المصالح والبزنس مع رجال الأعمال.
لكن لو حد عاوز يعرفهم، أنا عارفهم بالاسم، ممكن ابعتهم، لكنكم لا تريدونهم لأن الذين ابعدوهم لا يزالون أحياء يرزقون سحتاً، فدعوهم وشأنهم، هم لن يموتوا كمداً، بل أنتم الذين ستموتون فساداً، "وسيعلم الذين ظلموا أي منقلب ينقلبون ".
