يا تعيش حكيم يا تموت قوي

لما بتحب حد أوي بيبقى بينك وبينه خيط رفيع تخاف تشده او تمشي عليه احسن يتقطع فتفقد اللي بتحبه ويروح منك، ولما بتحب حد أوي بتمشي على طروف صوابعك عشان توصله او تحكيله لخوفك انه يزعل منك ، وللاسف مبتقدرش تحكيله ولا تشرحله اللي جواك ، لا تعرف تقوله مين انت ولا عاوز ايه منه ولا بتحب ايه ولا بتكره أيه ، لأنك طول الوقت بتفكر فيه وبالك مشغول عليه ، فبتعمل ألف حساب انك تحكي عن نفسك او طباعك لانه غالباً بيفهمك غلط وبيقابل ده بصم ودانه ومقاطعتك فى الكلام وعدم استجابته لأي حاجة منك .
#حكاوي_علام 
عشان كده تلاقي معظم الناس اللي بيحبه بعض صامتين ومبيتكلموش بالقدر الكافي مع بعض ، كل واحد حاطط همومه جواه وساكت ، ومع أول نقاش او حديث تلاقيهم زعلوا من بعض ، بحجة انه مش مهتم وانه مش عاوز يسمع ، او انها مش قادرة تفهمه او تدخل جواه .
#حكاوي_علام 
والحقيقة دا موضوع بيجلب الهموم على طول ، وبيخليك مش مستريح مع الطرف التاني ، ممكن تكون مبسوط معاه لأنك بتحبه ، بتحب شكله تفاصيله ريحته نفسه جنبك ، وجوده فى حياتك بيخليك مبسوط ويمكن متقدرش تستغني عنه ، بس مش مستريح ، لأنك بتعمل ألف حساب للكلمة اللي بتقولها وللحركة اللي بتعملها .
#حكاوي_علام 
نجيب محفوظ الله يرحمه كان في منتهى الذكاء والقدرة على التغلب على مشاعره ، لما جه يتزوج اختار ست عادية جداً ، مش مطلوب منها غير انها تكون ست بيت ، يعني تظبط البيت وتشوف طلباته وتربي العيال ومتسألوش رحت فين وجيت منين ، سهرت ولا نمت ، قريت ولا كتبت ، هو كان عارف ان الكتابة والأدب مينفعش معاهم شريك ، بس كان مؤمن بأهمية الجنس الأخر في حدود هو رسمها لنفسه وحياته قبل ما يبدأ رحلة البيت والولاد والحياة الأسرية ، واكتفى بمحرابه بين كتبه وافكاره وجمهوره .
#حكاوي_علام 
ويمكن لو كان عايش دلوقتي وسألناه عن حياته ، كان هيقول : أنا مستريح بس مش مبسوط ..والحياة كده ، يا إما تكون مستريح يا إما تكون مبسوط ، وكل حاجة منهم بتيجي على حساب التانية ، وحتى الآن مشوفتش حد جامع بين الاتنين ، يا إما يكون مبسوط يا إما يكون مستريح .
#حكاوي_علام 
لكن مع مرور الوقت والتقدم فى السن بيبقى خيار الراحة افضل بكتير من الانبساط ، يعني بييجي عليك وقت تعجبك جزمة لكن مش مريحة ، فتروج تجيب المريحة حتى لو شكلها مش عاجبك ، بتفضل تاكل جبنة ورغيف عيش عادي وخياره ، لأنهم مش هيتعبوك زي اللحمة والفراخ والكباب ، بتجيب عربية تويوتا عشان عفشتها مريحة وسلسلة فى المطبات وتستغني عن ال BMW عشان ناشفة وعاوزه مجهود وصحة ومش مريحة فى المطبات .
#حكاوي_علام 
الحياة كده بتعشها مراحل ، يعني اللي كنت متعايش معاه بالقوة وانت صغير ومش حاسس انه مرهق ، لما كبرت ادركت انه بقى صعب ومعندكش مجهود تتعايش معاه دلوقتي ، فبتحاول انك تتعايش مع الأمور بالحمكة وتستبدل القوة ، لأن معندكش خيار تاني .
#حكاوي_علام 
والصراحة مبدأ الحكمة حلو أوي ولذيذ ومش متعب ولا مرهق ، يمكن لما بتفكر فيه شوية بيزعلك ويحز في نفسك وصولك للمرحلة دي ، لكن على كل الأحول هو خيار ملوش تاني ، ودي مش حالتك لوحدك ، الطرف التاني برضو كده ، لكن يظل الخيط الرفيع والمشي على اطراف الاصابع هو النمط والاسلوب المرهق والمتعب اللي مش عارف تغيره ، لأنك خايف تفقد اللي بتحبه ، ولأنكم انتو الاتنين في لحظة ما من النقاش بيرجع بيكم الزمن عشرين تلاتين سنة وكأنكم لسه متعرفين على بعض ولسه متزوجين ، مفيش حد عاوز يدرك في اللحظة ذاتها انه كبر واللي معاه كبر حتى لو قولنا الكلام بالبق ، اللي اتربى على حاجة مش ممكن يتغير ..ولا يمكن هتقدر تقنع اللي معاك انك كبرت وان بنت زميلك اللي في عمر ولادك بتسلم عليك وتحضنك لأنك زي ابوها ، ولا يمكن هتقدر تقنعها انك بتبص على بنات العشرين نظرة بريئة لانهم حلوين بزيادة فبتتمنى انك تزوج ولادك ليهم ، ولا انك بتبص عشان لبسهم بقى خليع اوي ، ولا هتقدر تقنعها انك شوفت مشهد لسيدة متعرية والموضع زعلك ، غالباً كل حاجة هتتاخد على محمل ان اللي فيه داء مش هيبطله وان ديل الكلب عمره ما هيتعدل مهما كبر ، فى النهاية انت متهم على طول الخط .
#حكاوي_علام 
والحقيقة ان معندكش خيار تاني ممكن تعمله ، يعني معندكش قدرة على انك تبدأ حياة جديدة ، مش عشان مفيش معاك فلوس ولا صحتك مش مستحملة ، لا ، دا عشان معندكش صبر انك تدخل في علاقة تانية مع حد تاني لسه هتعرفه وهيعرفك ومفيش بينكم لا ود ولا رصيد انكم تستحملوا بعض ، لأنك غالباً هتختار حد في سنك ونفس ظروفك ، ودا برضو مر بتجارب زيك بالظبط وبيدور على الراحة اللي مفتقده في حياته ، وغالباً هو مش جاي يربي من جديد ولا جاي يتحمل قرف غيره ، دا عاوز نظام هو راسمه في دماغه ولو ملقهوش مش هيستنى دقيقة ، عشان كده الرضا بالمكتوب اهم حاجة ، وان الكلام اللي اتكتب عن ازمة منتصف العمر وما بعدها كلام مدروس ومعجون بالتجارب ، وبلاش حد يستهون بيه ومياخدوش بعين الاعتبار .
#حكاوي_علام 
الحياة مدرسة كبيرة ، وزي ما فيها كل حاجة هي برضو بتحوش عنك حاجات وتديك حاجات ، ودا يخلينا نؤمن بالاقدار وان مفيش حد بياخد كل حاجة ، اي نعم انت بتاخد حظك 24 قيراط ، بس متفاوتين ، يعني زوجة حلوة وجميلة ونضيفة ، بس معاها شوية مشاكل وقلبت وش ، زوجة نص نص بس معاها شوية راحة وروقان ، شوية فلوس على عربيات على بيوت ، بس معاهم عيل مسود عليك عيشتك ومخليك مش متهني بحاجة ، شغل كويس وفيه فلوس ، بس زمايل مش تمام وعينهم تفلق الحجر ، مكان حلو ساكن فيه ، بس عندك جيران وحشين …هي الدنيا كده واللي يفهمها غير كده يبقى غلطان ، لأن الموضوع مش بالفهم ، الموضوع بالتجربة والمعايشة ، والانسان الذكي اللي يعرف يعيش يومينه وهو مستور وخلاص ، ومش مهم تعبان شقيان مستريح مبسوط ، المهم انه يستر نفسه على اد ما يقدر وخلاص ، ويحاول ميخسرش اخرته لأن مفيش ليها حل ، هي كده وربنا خلقها كده وهتفضل كده ، وثق تماماً ان الناس اللي انت شايفهم مبسوطين على طول ، دول ناس بيمثلوا السعادة على مسرح الحياة .

#حكاوي_علام #عثمان_علام