عبقرية المصريين ليس لها حدود، حتى وهم يبكون على غلبهم ونكدهم وقلة حيلتهم، حتى وهم ينكتون على بعض، حتى وهم مهمومون بأكل العيش، حتى وهم يتحملون سخافات بعضهم.
من قبل كتبت مقال بعنوان: "كان عندك حق"، وبدأته بشخص بيسأل صاحبه أنت دايماً مبسوط ومزاجك حلو ليه؟،- رد عليه: علشان كل ما واحد يحاول يجادلني بريح دماغي واقوله عندك حق، صاحبه قاله بس كده غلط، رد عليه: عندك حق.
والصراحة انا كل مااتكلم مع واحد ويسوق لي أعذار ومبررات بقوله عندك حق، حتى لو كانت مبرراته غلط، حتى في البيت ومع الجيران والاولاد بقولهم عندكم حق، وأحيان كتير بيكونوا غلطانين..لأني اكتشف عدم القدرة على إقناع كل واحد بأنه غلطان ..ويمكن أكون أنا نفسي غلطان.
وبعدين هقنع مين ولا مين، وهو مين أصلاً اللي عاوز يقتنع، دي القرعة بقت تتباهى بشعر بنت أختها...المهم الواحد يريح دماغه ويقول" عندكم حق"...لأنه محدش عارف مين الصح ومين الغلط، يبقى كل واحد عنده حق.
طيب حد يقدر يقولي هيبقى حاله إزاي لو منافقش المدير بتاعه؟؟، وهيعمل أيه لما تقريره يطلع ضعيف او جيد وتضيع منه الترقية!!، يبقى عنده حق ينافق ولا لأ ؟
طيب واللي بيروح يدفع عشان يخلص ورق في الشهر العقاري أو في الحي عشان يطلع رخصة، ماهو عنده حق، لأنه لو مدفعش مفيش حاجة هتمشي، يبقى عنده حق...طيب ولو مراتك مبتعرفش تطبخ، وطبخت طبخة جابتلك مغص كلوي، هو كنت تقدر تقولها اكلك وحش؟، طبعاً لا، لازم يقول حلو، وعنده حق، لأنه لو قال غير كده حياته هتبقى نكد، وخد عندك....طيب حد يقدر يقولي الناس اللي اترقت اترقت ازاي واللي مترقاش مترقاش ليه؟ مع انه فيه تشابه في الحالة وفي السنين...طبعاً محدش يقدر يجاوب، يبقى إللي خد القرار عنده حق...طيب حد يقولي أيه علاقة الزيت بالغاز والتعدين بالإنتاج، والآداب بالتطوير ..محدش يقدر، لأنه فيه 2 مسئولين لا علاقة لهم بالبترول ولا بالغاز ، وماسكين المناصب دي، زي برج القاهرة ما هو في الجيزة وجامعة القاهرة في الجيزة وجامعة عين شمس في العباسية...الموضوع قديم، يبقى عندهم حق...طيب حد يقدر يقولي ليه رئيس ميدور مبيتحركش من مكانه ويمسك شركة تانية!!، كله عارف السبب بس محدش بيتكلم، يبقى الدكتور عنده حق...طيب ليه حتحوت قاعد في إنبي بعد ما قال في التليفزيون أنه مش متخصص في التصميمات؟ لأنه محدش قادر يمشيه..يبقى عنده حق يعمل ويقول أي حاجة...وكلكم عندكم حق.
