هناك طرق كثيرة تجعلك تستمتع بحياتك...لكن الطريقة المثلى للموظف كي يستمتع بحياته، الترقية.
وللحصول عليها المؤهل ليس شرط فيها ولا الكفاءة أيضاً ليست شرط، ولا جمال الأسلوب ولا الشكل ولا رجاحة العقل ولا التفكير، ومش ضروري كمان تكون مهندس او كيميائي او جيولوجي أو محاسب او قانوني أو إداري ناجح عشان تترقى، ومش ضروري تكون مهذب ولا محبوب من زمايلك، دا كله كلام فارغ...الترقية لها طريق واحد...حضرتك تحضر كرسي عن كيفية الإبداع في النفاق، يعني إزاي تبقى" معرض كبير "، يعني منافق مش عادي منافق مبدع، منافق غير تقليدي، وهو دا طريق الكرسي والفلوس.
وسيبك بقى من كلام، من جد وجد ومن زرع حصد ومن أراد الثمار فعليه بتسلق الأشجار، هذا كلام لا وجود له على أرض الواقع، عاوز تتسلق الأشجار أتسلق أنت حر، بس كمان سنتين هتفضل متشعلق فى الشجرة وغيرك قاعد على الكرسي، لأنه في الهرم النفاقي، يوجد عدد من الموظفين، كل مجموعة لها مدير، من بين كل مجموعة يخرج واحد هو الذي يسيطر على كل شيئ، ليس لشطارته ولا لأدبه لا سمح الله، ولا لأنه المنافق الوحيد لمديره، "أصل النفاق بقى في الدم والكل بينافق"، لكن لأنه أبدع في النفاق.
عشان كده مش ضروري تتعب نفسك وتكافح عشان حاجة ممكن تاخدها بالساهل، فممكن مثلاً تسمي إبنك على أسم مديرك، أو بنتك برضو، يعني لو مديرك إسمه تيمور سميها تيموره، ولو أسمه خليل سميها خليله، ولو أسمه ناجي سميها ناجيه، ولو مديرك تعب وعاوز نقل دم أتبرع بدمك، ولو فصيلتك غير فصيلته غير دمك بفصيله زي فصيلته
ولا حظ أن هذا الكُرس التدريبي النفاقي، خلى فيه ناس عندها ٤٣ سنة بتاخد في الشهر ١٢٠ ألف جنيه، وناس حصلت على أعلى درجات السلم الوظيفي وهم حاصلون على بكالوريوس محاسبة ونظم ادارية ، دا غير أبو مؤهل متوسط وبيترقى كل سنة وعنده ٦ بطاقات كل واحدة منهم بمسمى وظيفي مختلف...و القرآن قال" إن المنافقين في الدرك الأسفل من النار"، بس ربنا غفور رحيم!!
