كلما سألت مسئول عن أحواله وأحوال الشغل وأحوال شركته أو هيئته أو أحوال أسرته أو حتى الأحوال الجوية يكون الرد" والله الأحوال مش مستقرة ، والدنيا صعبة ومفيش حد بيسندنا بس ربنا كبير"، ويفضل يذيع النشرة الجوية وكأننا مابين طوبة وأمشير.
وبعدين تسأل واحد كان مسئول "معاش يعني"ويكون رده: والله إحنا تعبنا وشقينا وبنينا وهدينا وشيدنا ،ونشرة كبيرة زي نشرة أخبار البورصة لما تكون كسبانة أو نشرة أخبار الفراخ إللي بتيجي على القاهرة والناس.
المهم أن السمة التي تحكم وجهة نظر المسئول الحالي والمسئول السابق ،أن البلد ليس بها قيادات وإنهم من يوم ماسابوا كراسيهم والدنيا بقت بظراميط، مع أنهم هم السبب في الوكسة إللي إحنا فيها، طيب حضرتك يامسئول ياسابق ليه ماخلقتش صف تاني عشان يقلدك في الهدم والبناء قبل ماتطلع ، وأنت يامسئول ياحالي بتشكتي من نفسك ولا من من زملائك ولا من مين بالظبط؟
المشكلة الكبرى وإللي ملهاش حل...الذين يختارون القيادات هم أيضاً يشكون من قلة وندرة وعدم وجود قيادات ،ولو قلنا أن فلان ضعيف وأداءه غير جيد يأتي الرد منهم: دا المتاح... طيب العيب في مين ؟ومين المسئول بالضبط ، وهل مطلوب أن رئيس الجمهورية يشتغل كل حاجة ويتحمل مسئولية كل حاجة وحده وأنتم تجلسون على الكراسي فقط؟
لو عرفتوا إجابة لهذه الأسئلة ابعثوا بها إليّ يمكن أكون مخطئ وقصير النظر وسمعي تقيل ومش فاهم حاجة!!!
