أتصل بي موظف في قطاع البترول"قطاع عام"، يبلغ من العمر ٥٨ سنة، وحكى لى رؤية غريبة ومريبة ومربكة وغير منطقية، بس الواحد مش هيحاسب الناس حتى أحلامها، وأقسمَ عليّ أن أنشر رؤيته هذه.
يقول: جاني مسئول كبير أوي أوي وشيك خالص من الوزارة في المنام، وطبطب عليّ وقالي أنا عارف أنكم في القطاع العام مظلومين، وعشان كده أنا اتخذت قرار هيفرحك أوي، مش كده وبس دا هيفرح ولادك ومراتك لأنك هتقدر تجهز البنت وتزوجها وتجيب شقة للواد وتعمل ڤيزا للمدام وتشتري شاليه في الساحل ولو عاوز تصيف في مراسي هتقدر تروح، رديت عليه وقولت له أيه القرار ده أبوس أيدك أنا نفسي أخد شقة تمليك قبل ماأطلع على المعاش..قالي بص ياسيدي ، قولت له لا إنت إللي سيدي بس فرحني، قاله أنا قررت أن كل موظف في القطاع العام قبل مايطلع معاش بسنة هعمله ندب على شركة إستثماري، وهياخد كل المميزات إللي هناك ويعمل له قرشين قبل مايطلع، وفيه موظفين هعملهم ندب ست شهور بس عشان هيروحوا شركات ملهاش شغل بس بتقبض كويس أوي، وبعدين هعملكم ميزة زي بتاعت الشركة إللي أولها ألف وآخرها ياء بحيث إللي هيخرج معاش هنديله ٢٥٠ ألف جنيه يجيب بيهم عربية بيكانتو، رديت عليه وقولت له ياباشا أنا عيان وباخد علاج كتير ممكن تزود المعاش التكميلي ومش عاوز حاجة تاني ؟،- قالي دي بدرسها.
وانصرف المسئول ،والراجل يعيني صحي من النوم مبسوط وفرحان زي مايكون الحلم بقى حقيقة ،وظلت فرحته حتى صدمته مراته وهو خارج للهموم وقالت له متنساش تدفع قسط البت في الجامعة ،عشان رافضين يسلموها الكتب غير لما تدفع القسط الأولاني...واتصل بي يسألني أيه رأيك في الرؤية؟ زي ماأكون عثمان بن سيرين وليس إبن علام ،رديت عليه: هسأل حضرتك سؤال: هو سيادتك لما صحيت جالك مغص وبطنك كركبت ودخلت الحمام سهلت!! قالي آه..قلت له تبقى كنت نايم عريان يامعلم!!!
