01:42 am 23/11/2017
مغمور أفندي:
بعد ما أتأكد العمدة سليمان ان الشماشرجي على نفس النظام مش بال وسيكام بتاع تليفزيونات زمان العمده بيتكلم على نظام الإقطاعيين وعلاقتهم بالفلاحين ماهو كان زمان فلاح وياما قدم قرابين زي الشماشرجي ويمكن تزيد وبالمجهود والعرق والتضحيات اللي قدمها على أرضيات السرايا زمان بقى دلوقتي عمدة ميت الغانم المشهور ونرجع تاني نقول أرزاق راح منه نص لسان بس بالنص التاني بقى صاحب مكان كانت كل أمنياته زمان انه يمتلك فيه نص فدان ولأن لكل مجتهد نصيب وبغض النظر عن نوعيه الجهد والاجتهاد ربنا رزقه بالشماشرجي نجم الحلقات اللي شاف فيه نفسه زمان والشهادة لله إسمه طلعت الشماشرجي وطلع فيه كل السمات للصلاح والإصلاح
وبعد كل الشرح اللي فات وبتحليل الشخصيات طبعاً سيطر الشماشرجي على عقل سليمان وحسبله اللي ضاع من أرضه كام وقاله يافندم ٢٨٥٠ فدان ومن هنا ابتدى الكلام.
العمدة: ها إيييه الأخْبَايْ يا طَيْعَتْ..؟
الشماشرجي: كله تمام يا عمده إحنا عايزين نعمل شوية إجراءات علشان نرجع ال٢٨٥٠ فدان بدون أي معارضات
العمده: مُعَايْضَات إيييه إنت مش شايف شيخ البلد معاه كام والحاج حسين عنده إيييه
أنا المَفْيُوضْ أكون أكْتَيْ من الإتنين
الشماشرجي: يا عمده مظبوط بس الموضوع لازم يمشي بهدوء علشان أهل الكفر في الحيازة وزيادة الفدادين مابيتفهموش
العمدة: أنا يا شماشِيْجِي مَظْيُومْ ومينفعش أبقى العمده ويَاكِبْ حُمَايْ وتحت مني فَيّاحِينْ يَاكْبِين إحْصِنَه وحَنَاتِييْ
الشماشرجي: إحنا عايزين شهادة من المتر شفيق يقول فيها إن عمدة الكفر فقير ونجيب الريس زكريا مسئول الحيازة والأملاك يقول آمين بختمه المتين ماهو ريس العمال في مصانع البدري من زمان وعنده كل البيانات اللي تؤكد الكلام
العمدة: بَيَاوَا عليك يا إبن الشَمَاشِيْجِي فِكْيْ عَفَايِيِتْ بس تِفْتِكِيْ زَكَيِيّا يوافق ده حنبلي وإبن مصنع الحلمية ..!
الشماشرجي: زكريا مش هينقل أملاك ده يقفلهالك بالضبة والمفتاح ده هيكتب بس شهادة من بيانات الكفر تقول إن العمدة سليمان أرضه فيها حرده من اليمين والشمال وده واضح عنده في البيانات مش محتاجه كلام ومدخلش زكريا في باقي الترتيبات علشان هيقولك الأصول والمساواة، والباقي يا عمده كده عليك تاخد الشهادة بختم الريس زكريا وتعزم كُبَارات الكفر على خروف محشي مكسرات يختمو الشهادة فوق ختم زكريا ويضيفو بإيديهم في حيازتك ٢٨٥٠ فدان إضافية
العمدة: بس أنا عايزك تكون مع المِتْيْ شفيق وزَكَيِيّا
الشماشرجي: لا يا عمده انا هبقى بعيد واتفقت مع المتر شفيق لو احتجني في أي تفاصيل هرد بردو من بعيد أصل وجودي في الموضوع يعطل الأمور أصل انا وزكريا مش على اتفاق ودخولي هيفهم ان كده في حاجة مش تمام
العمدة: خلاص يا طَيْعَتْ اللي إنت شايفه بس المهم الإجْيَاءات تكون في السَيِيع لأن النفسية محتاجة شوية فدادين انت عَايَفْ المَصَايِيفْ
وزي ما رسم الشماشرجي الخطة بإتقان للعمدة سليمان وتم إضافة الفدادين بشهادة المتر شفيق وخِتم الحيازات وموافقة كُبارات الكفر دون استثناء وإستلم سلمونتي الأرضَيَات واتكتب إسمه في خانه الاقطاعيين والنبلاء ... وأثناء الإحتفال بهذا الإنجاز العظيم وتقديم الشكر للشماشرجي الأصيل صاحب منهج عودة الحقوق بمبدأ الصلاح والإصلاح ....رن تليفون الدوار لسه بيقول ألو انا العمدة سليمان طلع صاحب المقام الرفيع مسئول خطابات السرايا بيقوله بإقتضاب إحضر في الحال الملك عرف عملتك الهباب.
وانتظرونا الحلقة القادمة:
(ياترى مييين اللي قال للسرايا على عمايل العمده سليمان بضمه ٢٨٥٠ فدان بإجراءات شمال آخر الشارع شمال ...!؟
