كان أبي رحمة الله عليه مُدخن من الدرجة الأولي يشرب افخر أنواع التبغ على مدار أعوام طويلة .. وكان مزاجة العالي في السيجارة مع فنجان القهوة المظبوط .

وفي ذات صباح أرسل عامل مكتبة ليشتري له نوع السجائر المفضلة لديه كالعادة .. فغاب العامل أكثر من ساعتين ثم عاد .. ثار أبي عليه قائلاً " انت كل ده كنت فين ؟؟؟بتتفسح .. ابعتك تجيب سجاير من على الناصية تغيب اكتر من ساعتين !! " رد العامل " يافندم أنا قلبت الدنيا على نوع السجاير دي مش لاقيها أبداً لفيت وسط البلد كلها .. وفي الاخر بياع قالي ماتتعبش نفسك مش هاتلاقيها لانهم وقفوا استيراد كذا نوع  وده منهم .. ف حضرتك كده مضطر تجيب نوع تاني بداله وخلاص مافيش حل تاني .. "رد أبي " لا تشتري شئ ... شكراً لتعبك"

وبعد مرور ثلاثة أيام عزم صديق أبي عليه بسيجارة فكان الرد " شكراً انا بطلت تدخين" ...صديق أبي:  "نعم انت بتهزر"

أبي: " لا والله بتكلم جد .. بعت اجيب السجاير لقيت النوع اللي بحبه وقفوا استيراده .. فاستحملت تعب ٣ ايام وانتهينا ...انا بشرب النوع ده لاني بحبه ومزاجي النوع ده مع فنجان القهوة ... هم وقفوا استيراده ..يبقي انا اتذل علشان موظف في الحكومة اخد قرار يقوم يتحكم في مزاجي وكمان بفلوسي ...لا آسف مش أنا ..مش أنا اللي حتة ورقة بحرقها وفي الاخر برميها هي اللي هاتتحكم فيا..مش شارب "

الشئ بالشئ يُذكر .. بعد فترة مرض أبي ونصحة الطبيب بالامتناع عن احتساء القهوة ...- الحاجه اللي فضلت- لتجنب ضغط الدم المرتفع وقرح المعدة ... من ساعتها لم أري في يده فنجان القهوة ابدااااا إلي يوم وفاته - رحمة الله عليه .

طبعاً ده تصرف مدهش جداً بالنسبة لمعظم الناس.. الكل دايما يقول يعني مانا هاموت في ميعادي ..استمتع ... بلا كلام دكاترة بلا كلام فاضي ..يعني اموت واحرم نفسي من اللي بحبه مانا كده ميت وكده ميت ...انبسط بقه .

الحقيقة أن كل واحد طبعا هايموت في ميعاده لا هايقدم ثانية ولا هايأخر ثانية .. الفرق هنا .. هايموت بعد مايعيش حياة شكلها ايه .. اقصد "جودة الحياة - Quality of life " ده انت ليك يد فيه والا ماكانش ربنا هايحسبنا علي صحتنا.

ماترقدش في السرير بسبب حاجه ليك يد فيها ..لما يجيلك مرض او تتعب مايبقاش بسبب اهمالك لصحتك وترجع تقول اصل ربنا ابتلاني ... تفرق كتير اوي .

طبت حياً وميتاً يا أبي وجعل الله تدريبك وتربيتك لي علي ترويض نفسي و جعلي قوية الإرادة في ميزان حسناتك لأن اليوم تحققت نبؤتك ولولا قوة الإرادة لاصبحت في خبر كاااااااان.

اللهم متعنا وإياكم بنعمة وفضل قوة الإرادة.