أيمن حسين يكتب : كانت صدفة !

ساعات كتير بنمر بحاجات فى حياتنا أيا كانت إيه هي الحاجات دي ولأنها مش متوقعة أو مفاجأة بالنسبة لنا بنقول عليها صدفة ، بس أكيد مش صح ،  لازم تكون فاهم كويس الحاجة دي ممكن تكون مش متوقعة بالنسبة لك انت بعلمك المحدود لأن ربنا وحده يعلم المستقبل والغيب واللى هيحصلك بكل تفاصيله.
بس خلينى أقولك مفيش حاجة بتحصلنا صدفة ، مفيش حد بنقابله صدفة ، مفيش موقف بنتعرض له صدفة، كل حاجة وكل حد وكل موقف وأي شيء بنمُر بيه فى حياتنا هو مترتب وله أسبابه وقدر لازم نشوفه ونعيشه ، أي حاجة مرت في طريقك وعدت عليك حتى لو بشكل عابر هي حاجة كان لازم تمر بيها وتشوفها.
كل حاجة بتحصل لنا هي مكتوبة كدة وبالشكل دة بالظبط ولا زايدة ولا ناقصة ، جاية مخصوص ليك أنت وعشانك أنت على مقاسك بالظبط ، كل حاجة وجعتنا وكل حاجة فرحتنا هى برضو مكتوبة كدة ، مكتوبة بالحكمة الإلهية والغرض الربانى اللى متفصلة عشانك وعلى مقاسك بالملي وجاية فى وقتها ومعادها اللي ربنا حدده بالظبط ، الحياة مليانة حاجات كتير جدا بتحصل وبنقول ياه إيه الصدفة الحلوة دي أو حتى العكس نقول إيه الصدفة الوحشة دي عشان تاني هرجع أقولك كلامك غلط عشان كلمة صدفة نفسها غلط.
يقول رب العزة سبحانه وتعالى "إِنَّا كُلَّ شَىْءٍ خَلَقْنَٰهُ بِقَدَرٍۢ (القمر - 49)
كل اللى بيحصلك أكيد لسبب ربنا بس اللي عارفه وكاتبه ويمكن يجي علينا وقت بعد شوية نشوف الحكمة من الناس اللي بنقابلهم أو المواقف اللي بنتعرضلها أو الوجع أو حتى الفرح اللي بنحس بيه بسبب حد أو حاجة ، الوقت ده ممكن يكون بعد أيام أو شهور أو حتى سنين هتعرف ساعتها كان إيه السبب من اللى حصلك وهتفرح جدا من حكمة ربنا اللي خلتك تخوض تجربة زي دي وفي وقتها بالذات، وجايز جدا برضو تعيش حياتك كلها وتموت ومتعرفش سببه بس صدقنى حتى لو معرفتش هو أكيد كان عشان خير ليك أو منع عنك شر مكنتش تعرفه. 

الحياة بكل تفاصيلها مش صدفة ، فمتزعلش من حاجة وحشة حصلتلك لأن أكيد ليها حكمة من ربنا ، متزعلش من حد كنت شايفه حاجة وطلع حاجة تانية خالص لأن أكيد ربنا حاطه في طريقك لفايدة معينة أو درس معين كان لازم تتعلمه، الشخص دة مش اكتر من سبب أنك تتعلم حاجة أو حتى بسببه يمكن تحقق حاجة من غير ما يقصد حفزك ليها وبقى دافع نجاح كبير ومهم ليك بشكل او بآخر.
المهم أنك متزعلش ابداً على أي حاجة تحصلك وقول بس الحمد لله وارضى بكل حاجة تحصلك لأنه المكتوب، والمكتوب مفيش منه هروب واللي من نصيبك هاتخده ولازم هيصيبك بس كله بأمر الله وبمعاد هو محدده.
مفيش فى الدنيا حاجة أسمها كانت صدف كله مكتوب من ربك وحده علام الغيوب. 

كاتب المقال: الشاعر أيمن حسين مدير عام الإعلام بجهاز تنظيم انشطة سوق الغاز