من إبداعات إللي مايسمى:

المسبب أبو نص لسان شخصية كارتونية، من وحي الخيال، قد تنطبق على البعض ،لكنها حتماً لاتستهدف أحد بعينه، فقط هي تبرز خيال واسع لكاتب موهوب.

المسبسب ابو نُيْص يِسَان تشوفه وهو قاعد في المكان تقول عليه ابو الإحْتِيَامْ تقعد معاه تِحْتَايْ إنه كان فَسُوخَة ولا صاحب قَيَايْ ...بس اول ما يبدأ كلام وتستوعب لدغة اللسان وتدخل معاه في شوية مناقشات تعرف علاطول ان سرعة تنفيذه للتوجيهات هي السبب الحقيقي لوصوله هذا المكان ...ويفهمك انه الجن ابن العفييت لا يقبل المواءمات او التعليمات...من الآخر مالوش كبير والشغل عنده هو الأساس ..رغم ان التعليمات بيستقبلها في مكالمات..فتخيل كده يبقى في سفرية من السفريات لإنهاء اعمال تخص مستقبل كيان المفروض انه فيه اكبر مسئول يِينْ التليفون من احد مساعدين الكبير يقوله كلمتين ... عندك سواق قاعد دلوقتي في الجراج لازم يتعاقب في الحال ...!

وطبعاً ابو نص لسان يفييد صِدره ويْخَشّن في صوته ويتقمص دور صاحب قيياي ويكلم احد مساعديه الكِبار وبمنتهى العصبية يقول "الو ايوه يا فُلان بيه عندك وَيَدْ اسمه فُيَانْ قاعد دلوقتي في الجَيَاجْ بِيِتْصَيّفْ تَصَيٌفاتْ مش تمام .. وده تَهْيِيج..الوَيَدْ ده يِتْيِفِدْ في الحال واذا كان عَقْدُه من عقود زمان تَيْزي المكان يفَصّلّه قَيَايْ بوقفه عن العمل في الحال..وكالمعتاد يتنفذ كلام ابو نص لسان بدون اي اعتياض من اي لسان في المكان وهي دي سياسة الكيان   

ومش مهم الواد الغلبان بيته يتخيب او مستقبله يضيع بقياي ..المهم ان التوجيه يتنفذ ويتعمل زي ما اتقال ..وينجح ابو نص لسان في اول اختباي ويثبت انه جدير برئاسة المكان لسرعة تنفيذه للتوجيهات ..!

وواضح كده ان المسبسب اللي عامل فيها صاحب قرار مَتْعَلّمْش حاجه من اللي حَصَلّه زمان لما كان ماسك مكان وبسبب شوية قرارات هاج عليه اصحاب المكان وضربوه في المكتب واتقلب فار..وراح يشتكي في كل مكان ويقول للأصحاب القرار " ضَيَبُونِي في المكتب يا فندم ومش عَايِفْ آخُدْ قَيَايْ .... أيْجُوك يافندم انقلني من المكان انا كَيَامْتِي يَاحِتْ في البَحْيْ وانا عائلتي كلها من هناك...واتنقل لمكان اصغر من اللي كان فيه وزعل من عدم التقدير والظلم اللي وقع عليه وبَقى ماشي في كل مكان يقول 

"معقووول بعد ما أنْضِيِبْ وأَتْهَانْ يُيُوحْ حَقّي وأتْنِقِلْ لمكان أصْغيْ كمان....والله كده حَيَامْ..وإشتكى للحبايب والاصحاب وراح للراجل المحترم اللي كان شغال معاه زمان في الدور الثاني في المبنى الكبير علشان يشمله بعطفه ..!

ولم يغير هذا شيء من القرار 

بس النسيان آفت الانسان ودلوقتي بيعمل نفس اللي إتعمل معاه زمان، ونسي كمان انه صاحب عيال ومافيش اقرب من الأيام وكما تَدين تُدان..ودعوة المظلوم بيتفتح لها الف باب وباب

الله يسامح المالح ويُودُه ..اللي بِيِلْدَغ اللّسان ويمسح ذاكرة الانسان فينسى شُغلته كانت ايييه زمان...ماشاء الله كان بدرجة خبير في المبنى الكبير تخصص

"اللي مالوش شغلة تشغله يفتح الباب ويقفله"

انما تقول ايييه ايزاق،لو كُنّا قُولنا زمان ان المسبسب ابو نص لسان هيرأس في يوم هذا الكيان كان إتهمونا بالهَوَسْ والجِنان..!

وبردو مش عارفين يمكن يِنضِرِب فيه زي ما حصل معاه زمان ويتحكم عليه يُقف على بابه يقول

" أمَيَ أمييْ الأُمَيَاء بِحَفْيِ بِئْي في الصحيَاء"

وفي النهاية لا نملك الا الدعاء ربنا يبعد عنكم ثلاث لدغات

لدغة ثعبان الأدغال ... ولدغة عقرب الرمال ... ولدغة حرف اللسان اللي بتضرب الدماغ وتنسيك كنت اييه زمان..!